التكية..

التكية.. التكية مصطلح موجود من قديم الازل في اللغة العربية واللي البعض بيرجعوا لاصول تركية والبعض بيقول اصوله فارسية ، ما علينا من اصله وفاصله، المهم ان التكية هي مكان للاتكاء والرحرحة ودلدلة الرجلين ، بس طبعا كلنا عارفين قبل ما تدلدل رجليك لازم تكون راكب الاول مش كده ولا ايه..

تعالوا للموضوع اسم الموضوع جالي من صديقي الصدوق واللي كرسيه في ضهر الكرسي بتاعي لزم.
.. قلنا يا رب قالوا معاكو متخافوش قلنا يا رب قالوا هياخدو متقلقوش ..

طبعا موظف ومطحون ومفروم يبقى اكيد في حكومة يعني كل الفرم والطحن معروف منين والحمد لله مش معترضين على كده العادي بتاع كل مصري اللي اصبح بيتولد في دمه نسبه لا بأس بها من التكيف مع الفرم والطحن، لكن اللي مش طبيعي انك تلاقي وانت جوه الحكومة تكية .. ايوة بقيت تكية والموظفين المبطبطين الامامير مبسوطين وعايشين ولا فارق معاهم طبعا التكية مش ليهم للي فوقيهم وعليهم ولكن كله بيقولك يا عم خلينا ناكل عيييييش، ربنا يرحمنا يا رب.
لما تلاقي شيشة وكباب ومحمر ومشمر وسخن وبارد ودش ومدشش ونت ومنتش ومحلي ومباشر ومكتب ايه وفرش ايه وفخامة ايه يبقى انت عندنا في مقر ادارة التكية.. طبعا كل اللي فات ده لزوم الدلدلة والرحرحة. ولما تلاقي تعيينات لزوم المجملات، ومصالح ايه لوووز لوووز ، وحقوق ضايعة وموظف متهان ملهوش لازمة يغور نجيب غيره عشرة خليها تبقى عايلة في بعضينا طبعا ده كلام اصحاب التكية ،، لو لاقيت كل ده يبقى على طووووول انت عندنا في التكية.

بقولكم ايه نكمل بكرة

يوم السبت المقدس واحلامه..

كان ياما كان في حلم جميل اسمه (اجازة يوم السبت) واللي كل البشر حلمته وعاشته كمان ،،اما احنا لسة وكالعادة موظفين مطحونين لليك حق في اجازة ولا رفاهية ولا اي معاملة ادامية لازم تكون دايما مطحون مفرووم ومستوي.

هقولكم الحكاية ، بعد القرار الوزاري من حوالي سنتين تلاتة بمنح المؤسسات والهيئات الحكومية اجازة اسبوعية يومي الجمعة والسبت كلا حسب ظروفه مع زيادة ساعات العمل ساعة يوميا، طبعا كان قرار في الجول فرحنا وزأططنا وقلنا يا فرحنا يا هنانا يوم زيارات عائلية ويوم نوم وانتخة .. وقاعدنا مستنين قرار مجلس الادارة .. وكانت الصاعقة على رؤوسنا .. المعلم رئيس مجلس الادارة صاحب المناصب التانية الكتيييير . رد وقال على الموضوع المطروح في اجندة اعمال اجتماع المجلس .. انتو مش عايزين تشوفوني ولا اييييييييه دانا يوم السبت ده اجازتي من كل الدواهي التانية اللي بشتغل فيها واليوم الوحيد اللي بجيلكم فيه تقوموا عايزين تاخدوه اجازة.. ههههههه طبعا انتو مش واخدين بالكم ان عدد المواظفين عندنا لا يقل عن المائة ييجوا علشان البيه عايز يشوفهم يوم السبت .. والنبي مش حاجة تجيب شلل اطفال .

الحمد لله نجينا من الشلل بأعجوبة ، المهم جيه اليوم والمعلم بتاعنا اتشال من المنصب المنوط ليه .. وبقا فاضيلنا بقا هههه كل يوم نايم واكل شارب عندنا ، مش مهم الخير كتيير والحمد لله ،بس قلنا يا ملين كده ممكن ناخد السبت اجازة الحجة راحت خلاص، لكن فضل راكب دماغه مفيش يعني مفيش احنا مؤسسة خدمية ولازم نكون موجودين على طول ولو كترتو شوية هجيبكو الجمعة ، يالا ياد انت وهو حلو عن دماغي.. معلم معلم.
واخيرا يا جماعة الموضوع ده عملنا حالة نفسية مميتة يعني كل الغرف مرتبتها اكتر بكتييييير وسكتنا ناهيك عن الاجازات والحقوق والدلع واحنا حتى يوم اجازة واللي الدنيا كلها واخداه مش عارفين نطوولوه .

عموما انا عايز اصرخ واقول كفاية حرام لا حقوقنا واخدنها ولا يوم سبت واخدينه حتى فوانيس رمضان بطلو يجيبوهلنا .. هههههههه .. فوانيس رمضان ايه اوعو تصدقو .. اوكيه يا جماعة اسيبكم دلوقتي وهجيلكم بطحنة جديدة قريب .. قولو امين..

بداية الموظف المطحون

قالولك

عندنا ليك شغلانة حكومة

وبما اننا شعب الحكومة وان فاتك الميري اتمرمغ في ترابو

قلت بجد والنبى

قالولك اه ومش ها تصدق فين قلتلهم فين يعنى ؟؟؟

ردوا وقالوا اعصابك جامدة

قلتلهم حديد

قلبك بخير

قلتلهم تمام

صدموك وقالوا ها نشغلك فى ال جي سي سي

وطبعا كلنا عارفينها ولا ايه؟؟؟

طبعا انت ساعتها جتلك جلطة وعته مغولى حاد ومش مصدق نفسك

وقلت هو ده الكلام جي سي سي يعني دلع وفلوس ودرمغة

ورحت اشتغلت قلولك هتمضي عقد مؤقت لمدة ست شهور طيب وبعدين؟؟؟

قالولك وبعدين هنبقى نكلم عصفورة علشان تتعينو

وعصفورة راحت

وجه غراب والعياذ بالله ..........

وعقد في عقد وسنة في سنة ومابنلهاش حاجة

وكل مرة حجة مختلفة

مرة انتوا لسة معداش عليكو 300 سنة القانون بيقول كده وبعد اما عدوا ...

لا لا لا انتوا ملكوش مكان في الموازنة لازم يكون ليكو اماكن ولا تتعينو سعاه ايه رأيكم؟؟؟

انا عن نفسي مكنش عندي مانع.. بس للاسف قاللوي لا المؤهل العلمي بتاعك مش مناسب.. هههههههه

ما علينا قلنا طيب نعمل هيكل ونحط وظايفنا ...

وجرينا وسعينا بنفسنا مش حد بتاع شئون موظفين ولا غيروا

وفعلا وبعد ذهاب واياب وعذاب قدرنا وبحمد الله وفضله ان نقوم بفتح عكا..

ااه لا لا اسف اقصد قدرنا نعمل وظايف لينا في الهيكل الجديد وادي كمان عقد جديد

يا جماعة عايزين نتعين عدا علينا كتير حرام احنا خللنا لا لا لسة مستوتوش كويس لسة طعمكم ممرر ... ممرر!!!!! طيب....

وادينا صابرين واذا بفاجعة اسمها كهربائي طبعا من العائلة المالكة الغرابية اللي اتكلمنا عنها او متكلمناش احسن بردك

المشكلة في ايه يا جدعان ان مرتبه اعلى مننا ... ههههههههه تخيلوا طبعا احنا كنا هنتجنن ...

عملنا مشكلة كبيييييييييييييييييييييرة اد علبة كانز كده تمام واتكلمنا مع الامين ..

رد علينا وقال طب وايه اللي خلاكم مضيتم على العقود ما دمتم انتو شايفين انها قليلة...

اااااااااااااه خيانة وبيعة جامدة قوي ما علينا منها .. غلطة نعديهاله ومش هنكررها حاااااااااااضر بس كده..

ما علينا من التفاصيل كل اللي انا عايز اقولهولكم اننا نحب نوصل صوتنا لابعد الحدود..

ونوصلها لكل المؤسسات والمنظمات علشان نعرف ايه الآخر ..

لا عارفين نخطب ولا نتجوز ولا حتى ناكل ولا نشرب ..

ده المرتب بيكفينا مواصلات واكل فول وكشري بالعافية حرام معدتنا باظت..

واخيرا احب افرجكم على احد موظفي مركز معلومات ال GCC المطحونين وهو يلتقط انفاسه الاخيرة ..

يوميات موظف مظلوم

قالوا مكتبا للسجل عندنا يا مرحبا يا مرحبا..
خير وخدمة مميزة وشباك واحد ومصالح انما ايه فلة..
قلنا ربنا يوفق .. حذرونا من موظفيهم وقالوا كانوا زمان وخرجوا بفضيحة ..
قلنا لعل القادم اخير .. وربنا يستر ..
فتح المكتب وقالوا في نظام حديث كمبيوترات وبرنترات وياقوت ومرجان..قلنا ومالوا..
قالوا انزلوا قومو المكتب وبما انكم الاكفأ عايزينكم تكونوا معاهم وتكفوهم..
قلنا خير مافي مشكلة اهو كله شغل ..
ناس ذوق ذوق ذوق.. اكلنا وشربنا وهزرنا كطبيعة الشعب المصري ..اهبل وبريالة وبيثق في اي حد ما دام بيبتسم في وشه...
وكانت الفاجعة ..
بحيث اكتشفنا اننا ولمدة سنتين كنا طرابيش .. وتحت كل طربوش فيه قرعة .. اقصد فيه مصيبة ..
ظهر ولاول مرة سجل مضروب .. كــــارثة .. مش كده .. والله ما كانت هتبان واتحدى انها مكنتش اول مرة يحصل فيها الموضوع ده .. ولكن ظهر لان كان فيه كارثة حصلت بالسجل وهيا نصباية كبييييييييييرة بحوالي 32 مليون ، طبعا مش هقولكم 32 مليون ايه .. علشان الجرايد متزعلش مني لانها بتحب تقلف وتكتب اللي على مزاجها .. ولكن الحقيقة ان ده تمن الارض اللي عليها فندق باسم الشركة اللي اضرب سجلها والراجل يا عيني (النصاب ) ملحقش ينصب ولا حاجة لكن الجرايد بقا متنشرش خبر هفأ لازم ميقلش عن ارنب او فرخة او خنزير اليومين دول ... ههههههههه والله العظيم يا جدع .. يالا..
المهم .. نرجع للسجل .. طبعا كان فيه ابطال للقصة بتاعتنا ريس وتباع وست بيضة من جوه لا بيها ولا عليها.. وطبعا الموظف المظلوم بتاع الكمبيوتر.. واللي بيبصلوا كل الناس بحقد وحسد وكانه عبقري زمانه ويقدر يعمل اي حاجة بالجهاز الغلبان اللي تحت ايده ميعرفوش ان اخره يكتب ورقة بشلن لو كتبتها بايدك هيكون اسرع واقيم.. ههههههههه .. اه يا زمن..
اول ما حصلت الفاجعة .. ظهر كلا على حقيقته الريس والتباع اقصد طبعا .. وبعد جوابات الشكر اللي كان كل يوم يكتبها والجواب المصيبة اللي بيه كان عايز يدي واحد موظف مظلوم من بتوع الكمبيوتر الحق في انه يوقع ويختم بالشعار وما ادراك ما الشعار .. رسم على تقيل.. وبعد ماكانوا اولاده .. اذ فجأة يبقوا اعدائه ويشيلهم الجمل بما حمل علشان هو ضهروا واجعه يا عيني اما العيال دية رجالة وهتستحمل .. لسة شباب بقا..
اما بطل القصة التاني الخياط بتاعنا .. ااقصد المستشار بتاع الموظف المظلوم، الله يخـ..... يعمر بيته ... طبعا عرفتوا اصل الدعوة .. فكان منه نشاط غير عادي همة واقدام ومذكرة مخمخ فيها كما لم يمخمخ من قبل .. وبالصلة على النبي بعتها في جميع الجهات اللي تخطر على بالك طبعا مذكرة بالواقعة وفيها اسم الموظف المظلوم منور في صدر المذكرة .. اشي نيابة ادارية على نيابة عامة على مباحث اموال على الوزير رأسا والله اعلم يمكن يكون بعتها للريس والامم المتحدة....
طبعا وعلى هامش المذكرة قرار بوقف الموظف المظلوم عن العمل .. طبعا لانه مذنب لانه مزور لانه مرتشي لانه كل ذنبه انه مقلش لا.. واطاع الاوامر وبيشتغل في اي مكان دون اعتراض .. اشي شهادات على تعديلات على تصميمات على داتا بيز على شبكات على صيانة ومنظم اجتماعات ولقاءات رجال اعمال وساعات ساعي وبواب لو لزم الامر .. وعوضنا على الله.. طبعا الموظف بدأ يفوق شوية لانهم كانوا منيمينوا في الدرة وبيطبطبوا عليه ... المهم قرر انه يتظلم وفعلا كتب تظلم مدلوله انه يا جدعان مفيش حاجة بتدينا نهائيا انا مجرد اداة تستخدم لادخال بيانات تراجع اكتر من ثلاث مرات قبل وبعد الطباعة .. وكمان انا شغال في المكتب ده بامر شفهي مفيش حاجة بتقول اني لازم انزل او بتثبت تواجدي في المكان.. وغيره من الاسباب اللي لا تستدعي امر كهذا طبعا الموظف المظلوم قعد في بيتهم لا بينام ليل ولا نهار ولا بياكل ولا بيشرب ولا بيشتغل طبعا .. حاسس بظلم وقهر ملهوش اخر .. ربنا ما يوريكم ..
وبناءا على التظلم وحبة توصيات من اعضاء ليهم مصالح مضاده مع الاخ عصفورة صاحب القرار والترزي اللي خيطلوا القرار .. صدر قرار تاني بالعودة للعمل بعد اسبوع قلب حيات الموظف المظلوم ، بقا ليله نهار ونهاره ليل .. حسبنا الله ونعم الوكيل..
مش هطول عليكم .. قولوا طول .. قصة شيقة مش كده .. لسة الحبكة جايا ..
طبعا المذكرات اللي راحت للاماكن المذكورة سابقا .. بدأت تؤتي بثمارها اتحركت النيابة العامة وامرت المباحث بعمل اللازم واللي تمثل في مباحث الاموال العامة واللي قالت لريس الاوضة ابعتلنا حد فاهم الموضوع عايزين نفهم وكمان طبعا كان عندهم ريس وتباع السجل ،واللي صحيح مقولتلكوش انهم لموا حاجتهم من الاوضة واتكلوا على الله .. قاموا معانا بالواجب الصراحة بتوع المباحث اقصد ناس ذوق ذوق ذوق الصراحة فضلنا متكدرين شيء من الساعة 1 الضهر ولغاية 10 بالليل لا اكل ولا شرب ولا كلام ولا موبيلات ولا فيه حتى حمام.. اعملها على روحك لو مش هتقدر تمسكها .. طبعا الموظف المظلوم كان كل اللي بيعملوا انه بيتحسبن في اللي كان السبب .. روح بيتهم وهو خلصان وهلكان ووكل امره لربنا .. طبعا نفسية زبالة واحساس الظلم قاسي..
وبعدهم النيابة العامة قامت بالواجب وبعدها النيابة الادارية ومحاكم تأديبية ومرمطة....
طبعا هتحسوا اني طلسات الموضوع في الاخر ده لاني الصراحة اتخنقت مش عارف اكمل دلوقتي بس اللي جي اكتر وربنا يستر ..

رسالة حب من الحكومة لأبنها الموظف المطحون

عزيزى المواطن بتاع النضال
يا راكب دماغك و غاوى الحلال
نصيحة يا صاحبى بلاش الخيال
و غمض عيونك و ربى العيال

بلاش المناكفة و لايم و عيش
هتتعب معانا و سهمك يطيش
نلفق للاهلك قضية حشيش

و تصبح حكاية و نكتة و مثال:
تعالى و هاودنا و عدى الامور
و عيش فى الطراوة و خش الطابور
لكن لو هتزعل و دمك يفور
هنشهد نهايتك فى بحر الرمال

هتصبح حرامى هتصبح امير
هتصبح حرامى و ندل و اجير
و نقدر نلخبط فى اصلك كتيير
و جدك شحاتة هيصبح شحال

هنحلف ان الحبايب شافوك
بتقبض يا خاين و تقتل اخوك
ساعتها مراتك هتلعن ابوك
و تلطم و تنعى احط الرجال

مالكش انت دعوة بى اا اللى ضاع
و مين اللى شارى و مين اللى باع
و مين اللى كيل و مين اللى شال

فحب الحكومة و حب السلام
و علم ولادك يشدوا الحزام
علشان بكرة هياكلو حمام
و ينسوا الاسية و ينسوا الهزال

فلازم يا صاحبى تغمض عنيك
و طنش علينا نطنش عليك
و اياك تشاور نقطع ايديك
و تصبح مواطن ما يسواش ريال

عزيزى المواطن بتاع النضال
يا راكب دماغك و غاوى الحلال
نصيحة يا صاحبى بلاش الخيال

دعاء الموظف المطحون

اللهم أنقذنا من نفسنه الزملاء ..

وغباء الأصدقاء ومفاجأة الأعداء

اللهم ارحمنا من استبياع الجيل الجديد..

وحرائق السكة الحديد واستقصاد كل مدير..

ونداله القرايب الصغير منهم والكبير

اللهم أغثنا من كل عميل..

ومن فواتير موبينيل

اللهم أرحمنا من تشريفه عربيات المسئولين، وزحمة الشوارع في كل حين

وسحب الرخص في كل كمين.. من الغلبان مش م المتين

اللهم اهدى لنا سواقين الميكروباص ومدير الشركة البصب اص

اللهم ارحمنا من الشئون القانونية وشئون العاملين واللي بيقفوا فـ وسط الشارع فجأة وبدون إشارة يمين

اللهم قنا شر الكليبات .. وشر شلل البنات.. ولؤم الستات وغباوة الحموات ! والمينيمم تشارج كافيهات ..

وهيافة الصحف والمجلات وقطع الحرارة فجأة عن التليفونات وقت الزنقات

والمدارس اللي بتطلب تبرعات بالألافات ووقوع السيرفر وقفلة السايتات

اللهم ارفع مستوى الفريق القومي .. لمستوى أنبى والحدود.. أو حتى مستوى أسمنت أسيوط أو أرسل يارب عليه صاعقة .. بدل ما يخلونا نموت..

اللهم اجعل الدكتور محمد شعلان مديرًا للمنتخب والدكتور يحيى الرخاوي.. مدربًا عامًا .. والدكتور أحمد عكاشة.. رئيسًا لاتحاد الكرة المصرية حتى يعالجوه.. من الهبل والعبط.. يارب العالمين

اللهم سدد أقساطنا .. وضلل عنا مآمير الضرايب

اللهم ارزق جيل الوسط عقود عمل في ليبيا وقطر

اللهم افتح لجيلنا القديم الطريق الفسيح حتى ننظف انتخابات البلد من لعبة المراجيح

اللهم ارحمنا من الاكتئاب مرض العصر والشباب واحمي يارب سماء مصر من سحابة الهباب واكفنا شر صاحب الدقن الكداب وصاحب التصريحات النصاب

اللهم ارزق كل بنت بعريس هدية ..

وكل شاب بوظيفة وشقة وعربية اللهم أحرق الـ0900

واضرب الحرامية بالحرامية ونجح أي طالب في أي كلية حتى ولو كان في التربية الموسيقية

آآآميين يارب